!!!!مغامرات فى طرائق المدينة -ال مغامرات ال-

النهاردة كان آخر يوم في امتحاناتي وياااااااه عالراحة اللي أنا كنت حاسة بيها وانا خارجة من اللجنة بنت ال(.....) والمراقبين بيبتسمو ابتساماتهم الصفرا دى اللى تطلع الواحد من هدومه –وهنبقى نتكلم عن موضوع المراقبين ده بعدين- ,,, المهم يعنى الواحد ما كانش مصدق انه خد اطلاق سراح اخيرا وشم نفسه ,بعد 21 يوم من العذاب الاليم.. اتفقت انا وشوية عيال اصحابى اننا نعيث فى الارض فسادا ونجيب عاليها واطيها ,,,يعنى من الاخر نقضيها روشنة طحن عالاخر . كنا حوالى 13 وطبعا اصحابى من مؤيدين حزب(عضنى ولا تعض رغيفى) من الجماعة اللى همهم على بطنهم يعنى..,, وكان معانا اخو صاحبتنا –اسمه أحمد واد عسل كده فى سنة 6-هو صحيح طيب بس لما الأكل حضر حسيت ان هو كمان من مؤيدى الحزب اياه!!!! المهم يعنى انو بعد خناقات ومفاوضات وبعض الركلات اتفقنا ان احنا نروح مطعم مشهور(.....) ويا ريتنا ما روحناه ولا خطيناه. ليه؟ بتسألو ليه؟ صبركو كلو جاى فى الطريق ,, المهم طبعا دخلنا المطعم اياه وتمجلسنا وبالشعوب الجعانة اللى معايا دى اتطوع الواد الغلبان –اخو صاحبتى- انه يقوم يطلب ,هو مشكور والله بس هو ما كانش عارف الذل اللى مستنيه ومستنينا معاه وانا احب فى المناسبة دى انى اقدمله خالص اعتذارى .. طبعا عقبال ما قعدنا أدى ورصينا تربيزتين جنب بعض آدى ساعة الا ربع بلا مبالغة ,,, لا وإحنا قعدنا من هنا وشغل البنات والنميمة والحاجات اللى ما يعلمها الا ربنا بدات من هنا. طبعا كل واحدة عايزة انها تطلب بسرعة –افتكروا الحزب ها - والواد بيشد في شعره وطبعا اتذلينا في الحسابات ودفع الفلوس حوالي ساعة كاملة والله ,,لدرجة إن الموظفين زهقوا مننا –شغل بنات بقا- لحد ما طلبنا وأكلنا ,,,, والواحد حس براحة البال أخيرا. وبعد أما خلصنا بنبص لقينا بقدرة قادر البنات اللي كملونا13 لسه هيطلبو..... انتو فاكرين نفسكو هتترحموا والله لأكملها لكم بس بعدين عشان تعبت استنونى....